काठमाडौँ । साताको कारोबारको अन्तिम दिन बिहीबार धितोपत्र बजार परिसूचक नेप्सेमा गिरावट आएको छ। कारोबार अवधिभर दबाबमा रहेको बजार अन्त्यमा १३.८२ अंकले घट्दै २ हजार ६५४ अंकको विन्दुमा सीमित भएको हो।
बिहीबार कारोबार भएका कम्पनीमध्ये ६४ वटाको सेयर मूल्य वृद्धि भएको छ भने २०२ कम्पनीको मूल्य घटेको छ। यस्तै, १० कम्पनीको मूल्यमा कुनै परिवर्तन भएन।
बजारमा गिरावट आए पनि कारोबार रकम भने अघिल्लो दिनको तुलनामा केही सुधारिएको छ। बिहीबार कुल ४ अर्ब ६२ करोड रुपैयाँ बराबरको सेयर कारोबार भएको छ । बुधबार कारोबार रकम ४ अर्ब ४० करोड रुपैयाँ रहेको थियो।
समूहगत परिसूचकतर्फ व्यापार समूहबाहेक अन्य सबै समूह ओरालो लागेका छन्। बजारमा बिक्री चाप बढ्दा अधिकांश उपसमूहका सूचक नकारात्मक देखिएका हुन्।
