काठमाडौँ । क्यानडाका प्रधानमन्त्री मार्क कार्नीले क्यानडाले निर्माण लागत फिर्ता नपाउँदासम्म क्यानडा र अमेरिकाबीच बनेको नयाँ अन्तरदेशीय पुलबाट उठ्ने टोल आम्दानी अमेरिकासँग नबाँड्ने बताएका छन्।
ओन्टारियोको विन्डसर र अमेरिकाको मिशिगन राज्यको डेट्रोइटलाई जोड्ने ४ अर्ब ७० करोड डलर लागतको गोर्डी हाउ अन्तर्राष्ट्रिय पुल यही जुलाई २७ देखि सञ्चालनमा आउने तयारीमा छ । पुल निर्माणको सम्पूर्ण प्रारम्भिक लागत क्यानडाले व्यहोरेको हो।
बिहीबार आयोजित पत्रकार सम्मेलनमा प्रधानमन्त्री कार्नीले सन् २०१२ मा क्यानडा र मिशिगनबीच भएको सम्झौता यथावत् रहेको स्पष्ट पारे । उनका अनुसार उक्त सम्झौताअनुसार पुल निर्माणमा लागेको सम्पूर्ण लागत उठाएपछि मात्र टोलबाट प्राप्त आम्दानी अमेरिका र क्यानडाबीच बाँडिनेछ।
पुल बनाउन लिएको ऋण चुक्ता भएपछि सञ्चालन, मर्मतसम्भार र हिउँ सफा गर्ने खर्च कटाएर बाँकी रहेको आम्दानी पहिलो १५ वर्षसम्म दुवै देशले बराबरी बाँड्ने कार्नीले बताए ।सुरुआती वर्षहरूमा सञ्चालन खर्च बढी हुने भएकाले खुद आम्दानी धेरै नहुने अपेक्षा पनि उनले व्यक्त गरे।
यसअघि अमेरिकी राष्ट्रपति डोनाल्ड ट्रम्पले पुल सञ्चालनका विषयमा अमेरिकाले झन् राम्रो सम्झौता हासिल गरेको दाबी गरेका थिए । तर कार्नीले क्यानडाको हितविपरीत कुनै नयाँ व्यवस्था नभएको बताएका छन् । यद्यपि क्यानडा र अमेरिकाबीच भएको पछिल्लो सहमतिका विस्तृत विवरण सार्वजनिक गरिएको छैन।
रोयटर्सका अनुसार दुई स्रोतले अमेरिकाले भविष्यमा टोलबाट हुने नाफाको ५० प्रतिशत हिस्सा पाउने र हालको दरभन्दा १० प्रतिशतभन्दा बढी टोल वृद्धि गर्नुअघि अमेरिकी पक्षको स्वीकृति आवश्यक पर्ने सहमति भएको बताएका छन्।
